L Princepico

Para Léon Werth

Pido perdon als garoticos por tener dedicado este lhibro a ua pessona crecida. Tengo ua buona çculpa: esta pessona crecida ye l melhor amigo que tengo no mundo anteiro. Tengo outra çculpa: esta pessona crecida ye capaç de antender todo, anté ls lhibros pa ls garoticos. Tengo ua terceira çculpa: esta pessona crecida bibe an Fráncia, onde passa fame i friu. Bien percisa de ser cunsolada. Se todas estas çculpas nun chégan, anton, dedico este lhibro al garotico que essa pessona crecida fui an tiempos. Porque todas las pessonas crecidas fúrun purmeiro garoticos. (Mas poucas se lhémbran disso.) Corrijo, anton, la mie dedicatória:

Para Léon Werth
quando era rapazico


I



Quando you tenie seis anhos, bi ua beç ua eimaige mi guapa nun lhibro subre la floresta birge que se chamaba "Stórias Bibidas". L'eimaige mostraba un quelobron a angulhir ua fiera. Eiqui teneis la cópia de l dezeinho.
L lhibro dezie: "Ls quelobrones angúlhen las presas anteiras, sin las maçcar.
Apuis, nun se puoden mober i drúmen durante ls seis meses que demora la digeston."
Pensei, anton, muito subre las abinturas de la selba, i cunsegui cun un lhápeç de quelor fazer l miu purmeiro dezeinho. L miu dezeinho númaro un. Era assi:


Mostrei la mie obra-d'arte a las pessonas crecidas. I preguntei-le se l miu dezeinho le metie miedo.
Eilhas respundírun-me: "Por que ye que un chapéu mos iba a meter miedo?".
L miu dezeinho nun era ningun chapéu. Era un quelobron a fazer la digeston dun eilefante. Pa las pessonas crecidas antendéren, precísan siempre de splicaçones. L miu dezeinho númaro dous era assi:
Las pessonas crecidas acunselhórun-me que era melhor acabar culs dezeinhos de quelobrones abiertos ou cerrados i anteressar-me más por jografie, stória, númaros i la letra.


Fui assi que deixei de lhado, als seis anhos de eidade, un grande feturo cumo pintor.
Habie quedado zanimado pul ansucesso de l miu dezeinho númaro un i pul miu dezeinho númaro dous.
Las pessonas crecidas nunca anténden las cousas a la purmeira, i cansa ls garoticos tener que splicar siempre todo...
Sculhi, anton, outro oufício i daprendi a guiar abiones. Bolei un pouco por todo l mundo i la jografie ajudou-me muito. Sabie çtinguir, a la purmeira bista, la China de l'Arizona. Fai muito jeito se mos perdirmos pula nuite.
Durante la mie bida, tocou-me a tratar cun muitas pessonas sérias. Cumbidi muito cun eilhas. Mirei-las d'acerca. Nin por isso quedei cun melhor eideia de las pessonas crecidas.
Quando ancuntraba ua que me parecie un pouco más spabilada, spormentaba mostra-le l miu dezeinho númaro un, que trazie siempre cumigo, a ber se eilha era mesmo capaç de antender algua cousa. Mas oubie siempre la mesma repuosta: "Ye un chapéu." Anton nin sequiera le falaba an quelobrones, nin an selbas, nin an streilhas. Ponie-me al nible de eilha. Falaba de bridge, de golfe, de política i de gorbatas. La pessona crecida quedaba mui sastifeita por ancuntrar un home cun tanta rezón.

Comentários